डॉ मनोज भद्रे पोलीस दवाखाना माहीम येथे रुजू.
उरण दि 21(विठ्ठल ममताबादे )उरण तालुक्यातील इंदिरा गांधी ग्रामीण रुग्णालयाचे वैद्यकीय अधीक्षक डॉ मनोज भद्रे यांची बदली पोलीस दवाखाना माहीम येथे आरोग्य अधिकारी म्हणून झाली आहे. त्यांच्या बदलीचे वृत्त समजताच अनेकांना अश्रू अनावर झाले. उरण मध्ये असताना डॉ मनोज भद्रे यांनी रुग्णांना दिलेल्या उत्तम सेवेचे कौतुक करत उरण मधील नागरिकांनी, त्यांच्या चाहत्यांनी, मित्र परिवाराने त्यांचे अभिनंदन करत पुढील वाटचालीसाठी शुभेच्छा दिल्या आहेत.
उरण तालुक्यातील शहरी विभाग असो किंवा ग्रामीण भाग असो सर्व लोकांच्या मनात सरकारी हॉस्पिटल मधील डॉक्टर म्हणून एकच नाव तोंडावर होते ते म्हणजे डॉ मनोज भद्रे. त्यांनी त्यांच्या कार्यकाळात नेहमीच सर्व रुग्णांना आणि त्यांच्या नातेवाईकांना धीर दिला आणि योग्य उपचार करून बरे करून घरी पाठवले. केंद्र सरकार किंवा राज्य सरकारच्या सर्व योजना त्यांनी योग्य प्रकारे राबवल्या. अतिशय कमी सोई सुविधा( infrastructure) आणि कमी डॉक्टर्स असूनही रुग्णांची हेळसांड होवू दिली नाही. अतिशय स्मितभाषी असल्याने रुग्ण असो राजकीय हस्तक्षेप असो किंवा कोणीही असो त्यांचा नेहमीच सुसंवाद चांगला राहिला आहे.अनेक कठीण प्रसंग त्यांनी योग्य प्रकारे हाताळले. उरण तालुक्यातील कोणतेही पोस्ट मोर्टम(शरीर शव विच्छेदन)असो त्यांनी कधीच नाही म्हटले नाही. त्यासाठी त्यांनी कधीही वेळ काळ न पाहता मध्यरात्री येवून देखील पोस्ट मार्टम केले. उरण तालुक्यासाठी सोई सुविधांनी युक्त असे नवीन हॉस्पिटल व्हावे यासाठी मनापासून प्रयत्न केले आणि आवश्यक ठिकाणी पत्र व्यवहार देखील केला. अपंग व्यक्तींना फिजिकली हॅंडीकॅप्ट चे प्रमाण पत्र मिळण्यासाठी जिल्हा रुग्णालयाची टीम उरण ला बोलावून कॅम्प घेतले.गेली दोन वर्ष सतत कोरोना विषाणू पासून संरक्षण होण्याकरिता अहोरात्र प्रयत्न केले. ते उरण तालुक्याचे नोडल अधिकारी म्हणून काम पाहत होते म्हणूनच उरण तालुक्यातील कोरोना रुग्णांची संख्या आणि मृत्यू इतर तालुक्यातील संख्या आणि मृत्यू पेक्षा कितीतरी पटीने कमी होती.शासनाने त्यांचे हे अतिशय सुंदर काम पाहून त्यांची बढती पोलीस दवाखाना माहीम मुंबई येथे केली आहे. त्यांच्या या बदली मुळे एका चांगल्या व्यक्तीमत्वाच्या सेवेला उरणकर मुकले असले तरी उरणची जनता त्यांना कायमचे आपले मानते. त्यांच्या कार्याची आठवण उरणकर नेहमीच ठेवतील अशा भावना जनतेतून व्यक्त होत असून उरणच्या जनतेने डॉ मनोज भद्रे यांना पुढील वाटचालीसाठी शुभेच्छा दिल्या आहेत.