राज्यस्तरीय पत्रलेखन स्पर्धेत आवरे गावचा आगरी मुलगा प्रथम.
उरण दि ३(विठ्ठल ममताबादे )एकेकाळी जीवनाचा अविभाज्य भाग म्हणून पत्रव्यवहारातून दैनंदिन व्यवहार चालत होते. मात्र पत्रलेखन संकल्पना सध्या कुठतरी हरवत चालली आहे. घरोघरी सर्वांना सुखदुःखाच्या गोष्टी पोहोचवणारे पोस्टमन काका आजकाल कुठे दिसत नाहीत. पण ह्याच विषयाला पुन्हा एकदा संजीवनी देण्याचे काम वर्डालय मीडिया अँड पब्लिकेशन हाऊसने केले आहे. ११ जुलै २०२१ रोजी ह्या पब्लिकेशन हाऊस तर्फे खुली पत्रलेखन स्पर्धा आयोजित केली होती. ह्या स्पर्धेत वाचकांच्या आवडीचे पत्र ह्या कॅटेगरीमध्ये उरण तालुक्यातील आवरे गावच्या महेंद्र गुरुनाथ पाटील ह्या आगरी समाजाच्या मुलाने प्रथम क्रमांक पटकावला आहे.
ह्या पत्रलेखन स्पर्धेत अनेक विषय दिले गेले होते. ह्यात पावसाळा पत्र, महापुरुषाला पत्र, नकार दिलेल्या प्रेयसी/प्रियकराला पत्र, विठ्ठलाला पत्र, वृद्धाश्रमातून आपल्या मुला/मुलीस पत्र असे विषय होते. स्पर्धेला उत्स्फूर्त प्रतिसाद मिळत फक्त महाराष्ट्र नाही तर संपूर्ण जगातून ५०० हून अधिक पत्र वर्डालय मीडियाच्या पेटीत जमा झाली. ह्या स्पर्धेतून टॉप ६० अशा स्पर्धकांना निवडण्यात आले.
संपूर्ण महाराष्ट्रातून झालेल्या ह्या पत्रलेखन स्पर्धेत एका आगरी मुलाचे हे यश पाहून संपूर्ण उरण तालुक्यातील नागरिकांनी, साहित्यिक, कवी, लेखक यांनी त्याचे अभिनंदन करत त्याला शुभेच्छा दिल्या आहेत . लेखक महेंद्र गुरुनाथ पाटील यांनी ‘नकार दिलेल्या प्रेयसीस पत्र’ ह्या विषयावर पत्र लिहिले होते. वाचकाच्या पसंतीचे पत्र म्हणून त्याला पहिलं पारितोषिक मिळालं. हे पारितोषिक कविवर्य मा. इंद्रजित भालेराव सर (सुप्रसिद्ध मराठी साहित्यिक ) यांच्याकडून मिळाले.
महेंद्र पाटील यांच्या बद्दल सांगायचं झाले तर ते एक उत्तम लेखक आहेत.हे खूप कमी लोकांना माहीत आहे. त्यांनी आतापर्यंत ५०० हून अधिक कथांचे लेखन केलं आहे. ‘पाटीलजी’ म्हणून सोशल मीडियावर तो लोकप्रिय आहे. उरण तालुक्यातील आवरे गावात असे प्रतिभावान लेखक आहेत हे अनेकांना माहीत देखील नाही. महेंद्र पाटील हे आजपर्यंत प्रसिद्धी पासून दूर होते. आता प्रथम क्रमांक मिळाल्याने ते आणि त्यांची लेखनशैली,त्यांचे लेख आता चर्चेत आले आहेत.महेंद्र पाटील ह्यांना प्रथम क्रमांक मिळाल्याने त्यांच्यावर सर्व स्तरातून अभिनंदन व शुभेच्छांचा वर्षाव होत आहे.