दिशा व्यासपीठाच्या हिरकणीनी कर्नाळा ट्रेकिंग चे नियोजन महिला दिनानिमित्त केले
पनवेल /रायगड
गड, किल्ले महाराष्ट्राला लाभलेली दुर्मिळ संपत्ती आहे त्या संपत्तीच देखणं रूप तिचा गोडवा ऐकण्यासाठी अनुभवण्यासाठी दिशा व्यासपीठाच्या हिरकणीनी कर्नाळा ट्रेकिंग चे नियोजन महिला दिनानिमित्त केले होते. विशेष म्हणजे ट्रेकिंग चा ड्रेस न घालता अस्सल मराठमोळी वेशभूषा नववारी साडी परिधान केली ट्रेकिंग ची सुरुवातच शिवगर्जनेने करण्यात आल्यामुळे नववारी साडी परिधान करूनही कुठे अडखळलो नाही.किल्ला सर करण्यात हत्तीच बळच जणू अंगात संचारलं होत. गडाची बिकट वाट अनुभवन सुरु झालं. आज महिला कुठेही कमी नाहीत. ड्रेस असो किंवा साडी यशाच शिखर गाठण्यासाठी त्या नेहमीच तयार असतात जाणाऱ्या येणाऱ्या किल्ले प्रेमिकडून विशेष कौतुकाची थाप मिळत होती त्यामुळे किल्ला सर करण्यासाठीचा उत्साह वाढत होता.
किल्ल्यावर पोहोचल्यावर सौ दीपा खरात यांच्या शिवगर्जना व राजमाता जिजाऊच्या जायघोषाने पुन्हा एकदा किल्ला दुमदूमला. सौ विद्या मोहिते यांनी इतिहासातील महिलांची यशोगाथा व आपण त्यांचा आदर्श घेऊन कशा प्रकारे यशस्वी होऊ शकतो यावर मार्गदर्शन केले. किल्ल्यावरून आजूबाजूचा निसर्गरम्य सुंदर परिसर, गड बांधणी, पाण्याचा संचय, रस्त्याची चढन, भिरभीरणारी फुलपाखर, विविध प्रकारचे पक्षी….आणि पक्ष्यांचा किलबिळाट….गर्द झाडी, वाळलेला पालापाचोला, काही पानगळ झालेली झाडे… स्वच्छ आणि नितल आकाश…. जंगलाचे पारदर्शक प्रतिबिंब पाहून महिला दिन सार्थकी झाल्याचे दिशा व्यासपीठाच्या संस्थापक निलम आंधळे यांनी सांगितले. तुंगा ट्रेकर्स व नोमॅड व्हेन्चर्स इंडिया चे विवेक पाटील व गणेश गजरे यांच्या मार्गदर्शनाने ख़ुशी सावर्डेकर, कल्याणी ठाकरे,दीपा खरात, अनिता मागाडे, अरुणा शिरसाटे, अपर्णा कांबळे, रीना पवार, मंगल कानडे यांनी पारंपारिक वेशभू्षा परिधान करून किल्ला यशस्वीरित्या सर करण्यात आला .