बेकायदेशीर आठवडे बाजारांवर महानगरपालिकेसह पोलिसांनी कारवाई करण्याची मागणी
पनवेल दि.२० (वार्ताहर):खारघर, तळोजा परिसरात बेकायदेशीर आठवडा बाजार भरवले जात आहेत. यावर कारवाई करण्यात महापालिकेकडून दुर्लक्ष होत असून परिसरातील भाई-दादा या ठिकाणी बसणाऱ्या विक्रेत्यांकडून मोठ्या प्रमाणात वसुली करतात. आठवडा बाजारानिमित्त होणारी गर्दी, चोऱ्या तसेच बाजार उठल्यावर होणाऱ्या कचऱ्यामुळे परिसरातील नागरिक हैराण झाले असून कारवाई करण्याची मागणी होत आहे. खारघर, तळोजा परिसरात सिडकोच्या मोकळ्या भूखंडावर, तसेच मैदान, रस्त्यावर आठवडा बाजार भरवले जातात. यासाठी महापालिकेकडून कोणत्याही प्रकारची परवानगी न घेता काही तरुणांकडून वेगवेगळ्या दिवशी हा बाजार भरविला जातो. आठवडा बाजारात गोवंडी,मानखुर्द, मुंबई येथून व्यापारी माल विक्रीसाठी येतात. बाजारात कपडे, घरगुती वस्तू, भाजीपाला, खेळणी, चप्पल, शोभेच्या वस्तू, कटलरी आदी वस्तू खरेदीसाठी ग्राहकांची मोठ्या प्रमाणात गर्दी होते.
विक्रेत्याकडे विचारणा केली असता, बाजार भरविणाऱ्या दादा मंडळीला पन्नास ते शंभर रुपये द्यावे लागतात. ही मंडळी पोलिस, सिडको, पालिकेकडून होणाऱ्या कारवाईची सर्व जबाबदारी घेतात.
बाजार नियंत्रणाचा प्रस्ताव
पनवेल पालिकेत नोव्हेंबर २०१८ मध्ये झालेल्या सर्वसाधारण सभेत आयुक्त महापालिका क्षेत्रात बेकायदेशीररीत्या सुरू असलेले आठवडा बाजार नियंत्रणात आणण्याचा प्रस्ताव आणणार होते. या प्रस्तावाला महासभेची मंजुरी मिळाल्यानंतर नागरिकांच्या सूचना व हरकती मागवून त्यावर कार्यवाही करण्याचे ठरविले होते. आठवडा बाजाराला रितसर परवानगी दिल्यास महापालिकेच्या उत्पन्नात भर पडेल, असा विश्वास प्रशासनाला वाटत होता. मात्र त्यानंतर प्रस्ताव आलेच नाहीत.
कोट-
खारघर-तळोज्यात काही वेळा बेकायदा आठवडा बाजार भरविला जातो. मात्र त्यावर नियमित कारवाई केली जाते. – जितेंद्र मढवी, प्रभाग अधिकारी, खारघर