महाराष्ट्र भूषण डॉ.श्री. नानासाहेब धर्माधिकारी प्रतिष्ठान आयोजित रक्तदान शिबिरात रक्तदात्याचा ऐतिहासिक प्रतिसाद
595 रक्तदात्यांनी केले रक्तदान
खोपोली / प्रतिनिधी – शीतल पाटील
महाराष्ट्र भूषण डॉ.श्री. नानासाहेब धर्माधिकारी प्रतिष्ठान रेवदंडामार्फत आयोजित रक्तदान शिबिरात 595 रक्तदात्यांनी उत्स्फूर्तपणे सहभागी होत रक्तदान करीत एतिहासिक आकडा पार केल्यामुळे प्रतिष्ठानचे आणि दासभक्तांचे कौतुक होत आहे.
महाराष्ट्र भूषण डॉ.श्री.नानासाहेब धर्माधिकारी यांच्या जन्मशताब्दी वर्षा निमित्ताने खालापूर आणि खोपोलीतील श्री सदस्यांनी रक्तदान शिबिराचा संकल्प केला होता. शुक्रवारी श्री समर्थ मंगल कार्यालय खोपोली येथे रक्तदान शिबिराचे उद्धघाटन प्रसंगी अँफोन इन्फ्रास्ट्रक्चर चे डायरेक्टर रंजन कुमार मिश्रा, व्यवस्थापक रणजित झा, खालापूर नायब तहसीलदार राजश्री जोगी, जेजे मेडिकल डायरेक्टर नितेश पगारे, जेजे रक्तपेढी जनसंपर्क अधिकारी नीता डांगे, उल्हासनगर सेंट्रल रुग्णालय रक्तपेढी चे डॉक्टर एस पेटकर , समर्थ मंगल कार्यालयाचे मालक जनार्दन जाधव उपस्थितीत होते.श्री समर्थ बैठकीतील श्री सदस्य व बैठकी व्यतिरिक्त इतर मित्रपरिवारातील व्यक्तीनी रक्तदान केले. रक्तदानासाठी अगोदरच पाचशेच्या वर नोंदणी झाली होती. त्यामुळे श्री सदस्यांनी रक्तदात्याची गैरसोय होवू नये यासाठी नियोजनबद्ध व्यवस्था ठेवली होती. महाराष्ट्र शासनाचे जे जे महानगर रक्तपेढी मुंबई येथील डॉक्टरांचे पथक आणि उल्हासनगर सेंटर रुग्णालय रक्तपेढी येथील पथक शिबिरासाठी आले होते. रक्तदात्यांची आवश्यक तपासणीनंतर रक्तदानासाठी पाठवले जात होते.जे.जे महानगर रक्तपेढी मुंबई यांनी 465 तर उल्हासनगर सेंटर रुग्णालय रक्तपेढी यांनी 130 बॅग रक्तसंकलन केले.अतिशय शिस्तबद्ध पद्धतीने श्री सदस्यांनी शिबिराचे नियोजन केले होते.रक्तदात्याला नाश्ता तसेच रक्तदान केल्यानंतर प्रमाण पत्र याची सोय करण्यात आली होती.
स्थानिक डाॅक्टरांचे देखील सहकार्य मिळाले.ऊन्हाळ्यात सहसा रक्तदान शिबिरे होत नाही. त्यामुळे या दरम्यान रक्त टंचाई असते. परंतु डॉ.श्री. नानासाहेब धर्माधिकारी प्रतिष्ठानचे आभार त्यांनी रक्तदान शिबीर घेत विक्रमी रक्तदान केले. एका रक्तदात्यामुळे तीन जणांचा जीव वाचविता येतो असे मत डाॅ.नीता डांगे-जनसंपर्क अधिकारी जे जे महानगर रक्तपेढी मुंबई यांनी व्यक्त केली.