पोलिस उपायुक्त शिवराज पाटील यांनी केले रेस्क्यू टीमसह पोलिस अधिकारी, कर्मचारी व पोलिस पाटलांचा विशेष सत्कार
पनवेल दि.११ : पनवेल जवळील चंदेरी किल्ल्यावर गेलेल्या एका गिर्यारोहकाचा जीव रेस्क्यू टीमसह पनवेल तालुका पोलिस ठाण्याचे अधिकारी, कर्मचारी तसेच त्या भागातील पोलिस पाटीलांनी तात्काळ मदत करून वाचवल्याबद्दल परीमंडळ २ चे पोलिस उपायुक्त शिवराज पाटील यांनी प्रशस्तीपत्र व पुष्पगुच्छ देऊन विशेष सत्कार केला.
काही दिवसापूर्वी चंदेरी किल्ल्यावर ट्रेकिंगसाठी आपल्या सहकाऱ्यांसह गेलेल्या विराज संजय मस्के (वय २०) राहणार भांडुप याचा तोल जाऊन तो ६० फुट खोल दरीत कोसळला होता. याची माहिती पनवेल तालुका पोलिस ठाण्याचे वरिष्ठ पोलिस निरीक्षक रवींद्र दौंडकर यांना मिळताच त्यांनी तातडीने पोलिस उपनिरीक्षक उमेश गुटाळ, पोलिस हवालदार ओंबासे, बदलापूर रेस्क्यू टीमचे नागेश साखरे व त्यांचे इतर सहकारी, निसर्ग मित्र संस्थेचे सदस्य, रिटघरचे पोलिस पाटील दीपक पाटील, स्थानिक ग्रामस्थ यांनी अथक मेहनत घेऊन विराज मस्के याला बाहेर काढले व तातडीने पुढील उपचारासाठी त्याला बदलापूर येथे रवाना केले. या सर्व परिश्रमाचे पोलिस उपायुक्त शिवराज पाटील यांनी कौतुक करून एका छोट्याखानी कार्यक्रमात सहाय्यक पोलिस आयुक्त भागवत सोनवणे, वरिष्ठ पोलिस निरीक्षक रवींद्र दौंडकर व इतर अधिकारी वर्ग यांच्या उपस्थितीत या सर्वांचा सत्कार केला.
फोटो : पोलिस उपायुक्त शिवराज पाटील यांच्या हस्ते करण्यात आलेला सत्कार