नागरिकांच्या समस्या सोडवण्यासाठी शिवसेनेचा ‘जनता दरबार’
‘जिल्हाप्रमुख आपल्या दारी’ उपक्रमाचे नागरिकांकडून स्वागत
शिवसेनेच्या जनता दरबाराला तालुक्यातील नागरिकांचा उत्स्फूर्त प्रतिसाद
पनवेल: साहिल रेळेकर
तालुक्यातील शहरी भाग व ग्रामीण भागातील नागरिकांच्या समस्या तसेच सोसायटीतील अंतर्गत समस्या सोडवण्यासाठी शिवसेनेच्यावतीने ‘जिल्हाप्रमुख आपल्या दारी’ या संकल्पनेतून जनता दरबाराचे आयोजन करण्यात येत आहे. या उपक्रमाला नागरिकांचा उत्स्फूर्त प्रतिसाद लाभत असून शिवसेनेच्या या विशेष उपक्रमाचे नागरिकांमधून स्वागत होत आहे. शनिवारी (दि.१८ जून) संध्याकाळी ७ ते ९ यावेळेत खारघरमधील सेक्टर-१५ येथील घरकुल हौसिंग सोसायटीत जिल्हाप्रमुख शिरीष घरत यांच्या मार्गदर्शनाखाली व उपमहानगरप्रमुख प्रकाश गायकवाड, शहरप्रमुख गुरुनाथ पाटील यांच्या पुढाकाराने खारघरवासीयांच्या विविध समस्यांवर तोडगा काढण्यासाठी जनता दरबार भरवण्यात आला होता.
यावेळी नागरिकांच्या विविध समस्या जाणून घेण्यासाठी व त्यावर उपाययोजना करण्यासाठी सिडको, महापालिका, महावितरण, अन्य विभागाच्या अधिकाऱ्यांनाही बोलवण्यात आले होते. याप्रसंगी उपस्थित खारघरवासीयांनी पाणीप्रश्न, रस्त्यांची दुरवस्था, गटारांची दुर्दशा, खंडित वीजपुरवठा, सोसायट्यांच्या समस्या यासह विविध समस्या जिल्हाप्रमुख शिरीष घरत यांच्यासह शिवसेनेच्या पदाधिकाऱ्यांसमोर व प्रशासकीय अधिकाऱ्यांसमोर मांडल्या. सामान्य नागरिकांचे प्रश्न व सोसायट्यांच्या समस्या जाणून घेऊन त्यावर लवकरात लवकर योग्य उपाययोजना करण्यात येणार असल्याची ग्वाही जिल्हाप्रमुख शिरीष घरत यांनी दिली. याबाबत खारघरवासीयांनी समाधान व्यक्त केले आहे.
याप्रसंगी उपजिल्हा संघटक परेश पाटील, तालुका संपर्क प्रमुख योगेश तांडेल, महानगरप्रमुख रामदास शेवाळे, जेष्ठ शिवसैनिक विष्णू गवळी, उपमहानगर प्रमुख दीपक घरत, विधानसभा समन्वयक प्रदीप ठाकूर, तालुका संघटक भरत पाटील, विधानसभा संघटिका रेवती सपकाळ, तालुका संघटिका सुजाता कदम, उपमहानगर प्रमुख रिना पाटील यांच्यासह आदी पदाधिकारी व कार्यकर्ते मोठ्या संख्येने उपस्थित होते. खारघर वासीयांसाठी जनता दरबाराचे आयोजन करण्यासाठी उपमहानगर प्रमुख प्रकाश गायकवाड व शहरप्रमुख गुरुनाथ पाटील यांनी विशेष मेहनत घेतल्याबद्दल नागरिकांच्यावतीने त्यांचे आभार मानले जात आहेत.
यावेळी शिरीष घरत म्हणाले की, पनवेल महापालिका स्थापन होऊन पाच वर्षे पूर्ण झाली. तरीही नागरिकांचे पाण्याचे, रस्त्यांचे आदी मूलभूत प्रश्न अद्यापही सुटले नाहीत. सत्ताधारी नगरसेवक कधीही जनतेचे प्रश्न जाणून घेण्यासाठी आल्याचे दिसत नाही. निवडणुका जवळ आल्यावर यांना जनतेची आठवण येते. शिवसेनेचे कार्य हे नेहमीच तळागाळातील विविध प्रश्न सोडवण्यासाठी असून आम्ही या जनता दरबाराच्या माध्यमातून दारोदारी पोहोचत आहोत. नागरिकांचे प्रश्न सोडवण्यासाठी दिवसरात्र तत्पर आहोत. नागरिकांच्या ज्या काही समस्या असतील त्या आमच्यापर्यंत पोहोचवाव्यात. आम्ही त्या समस्यांचे निश्चितच निराकरण करून याची ग्वाही देतो.
चौकट:
गेल्या ३० वर्षांत याठिकाणी अनेक जिल्हाप्रमुख होऊन गेले. परंतु जिल्हाप्रमुख शिरीष घरत यांची कार्यपद्धती धर्मवीर आनंद दिघेंच्या विचारसरणीवर आधारित व त्याप्रमाणेच वाटचाल करणारी आहे. धर्मवीर दिघेंनी जसे कार्यकर्ते घडवले त्याप्रमाणेच शिरीष घरत हे कार्यकर्त्यांना सोबत घेऊन नागरिकांच्या विविध समस्या जाणून घेत आहेत व त्यांना योग्य न्याय देत आहेत. आणि याचा प्रत्यय मागील आठ दिवसांपासून जनता दरबाराच्या माध्यमातून येत असल्याचे प्रतिपादन तालुका संपर्क प्रमुख योगेश तांडेल यांनी केले.
कोट:
शिवसेनेचा मुळात जन्मच रयतेचे विविध प्रश्न सोडवण्यासाठी झाला आहे. पनवेल तालुक्यातील नागरिकांच्या विविध समस्या जाणून घेऊन त्यांचे निराकरण करण्यासाठी अशा पद्धतीच्या जनता दरबाराचे आयोजन करण्यात येत असून हे कार्य असेच पुढे सुरू राहील. नागरिकांना भेडसावणाऱ्या विविध समस्या पनवेल तालुक्यातील शिवसेना शाखेच्या माध्यमातून सोडवल्या जातात. परंतु ज्या नागरिकांना रोजच्या धकाधकीच्या जीवनात समस्या घेऊन आमच्यापर्यंत पोहोचता येत नाही अशा नागरिकांसाठी आम्ही नागरिकांच्या दारी जनता दरबार घेऊन आलो आहोत.
– रामदास शेवाळे, महानगरप्रमुख