आईसह ५ वर्षाचा मुलगा बेपत्ता
पनवेल दि.२४ : कळंबोली, सेक्टर १४ मधील सुमुख – को. ऑप. हाऊसिंग सोसायटीत राहणारी विवाहिता आपल्या ५ वर्षाच्या मुलासह बेपत्ता झाली आहे. या दोघांचा अद्याप ठावठिकाणा न लागल्याने कळंबोली पोलिसांनी बेपत्ता झालेली महिला आणि तिचा मुलगा या दोघांच्या मिसींगची तक्रार नोंद करुन त्यांचा शोध सुरु केला आहे.
सदर घटनेतील बेपत्ता झालेल्या महिलेचे नाव मिनाक्षी श्याम जैस्वार / आझाद (३२) तर तिच्या मुलाचे नाव पियुश श्याम जैस्वार / आझाद (५ वर्षे ६ महिने) असे आहे. सदर दोघेही कळंबोली, सेक्टर १४ मधील सुमुख को – ऑप हाऊसिंग सोसायटीत राहत होते. २ जून रोजी मिनाक्षीचा पती श्याम जैस्वार कामावर गेला असताना, घरामध्ये आपल्या मुलासह असलेली मिनाक्षी जैस्वार आपल्या ५ वर्षीय मुलाला घेऊन दुपारच्या सुमारास घरातून निघून गेली. सायंकाळी श्याम जैस्वार घरी आल्यानंतर घरात मिनाक्षी आणि मुलगा पियुश निदर्शनास न आल्याने त्याने सर्व नातेवाईक आणि त्याच्या मित्रांकडे शोध घेतला. मात्र, ते कुठेच सापडले नाहीत. अखेर श्याम जैस्वार यांनी कळंबोली पोलीस ठाण्यात मिनाक्षी आणि पियुश दोघेहीहरविल्याची नोंद केल्यानंतर पोलिसांनी बेपत्ता झालेल्या या माय-लेकाचा शोध सुरु केला आहे. मिनाक्षी जैस्वार हिचा वर्ण गोरा असून तिची उंची ५ फुट ३ इंच इतकी असून ती सडपातळ आहे. तिने अंगावर फिकट हिरवट रंगाची सलवार आणि काळ्या रंगाची लेगीस घातली आहे. तर पियुश जैस्वार याचा व गोरा असून त्याची उंची ३ फुट ६ इंच इतकी असून तो देखील सडपातळ आहे. त्याने अंगात केशरी रंगाचा टी-शर्ट व पांढऱ्या रंगाची जीन्स घातलेली आहे. दरम्यान, सदर वर्णनाची महिला आणि मुलगा कुणाला आढळून आल्यास त्याबाबतीची माहिती तत्काळ कळंबोली पोलिसांना द्यावी, असे आवाहन पोलिसांकडून करण्यात आले आहे.
फोटो : बेपत्ता सौ मीनाक्षी आपल्या मुलासह