पनवेल परिसरासह नवी मुंबई परिसरात चेन स्नॅचींग करणाऱ्या सराईत गुन्हेगारास अटक
पनवेल दि.२४ : पनवेल, नवी मुंबईसह इतर भागात चेन स्नॅचींग करणाऱ्या सराईत लुटारुला पकडण्यात तुर्भे एमआयडीसी पोलिसांना यश आले आहे. शेरु उर्फ सलमान साजीद जाफरी (२०) असे या लुटारुचे नाव असून त्याने आपल्या साथीदाराच्या मदतीने नवी मुंबई आणि मुंबई परिसरात चेन स्नॅचिंगचे अनेक गुन्हे केल्याचे उघडकीस आले आहे. त्यानुसार या आरोपीच्या सहकाऱ्यांचा शोध घेण्यात येत असल्याची माहिती परिमंडळ- १ चे पोलीस उपआयुक्त विवेक पानसरे यांनी दिली.
आरोपी शेरु उर्फ सलमान साजीद जाफरी याने मोटारसायकल वरुन आपल्या साथीदारासह तुर्भे एमआयडीसीतील कंपनीत कामाला जाणाऱ्या एका महिलेच्या गळ्यातील ७० हजार रुपये किंमतीचे १४ ग्रॅम वजनाचे दागिने लुटून पलायन केले होते. याबाबत तुर्भे एमआयडीसी पोलीस ठाण्यात गुन्हा दाखल झाल्यानंतर वरिष्ठ पोलीस निरीक्षक राजेंद्र आव्हाड यांच्या मार्गदर्शनाखाली गुन्हे प्रकटीकरण पथकातील सहाय्यक पोलीस निरीक्षक पवन नांद्रे आणि त्यांच्या पथकाने गुप्त बातमीदारांकडून तसेच तांत्रिक तपासाच्या आधारे आरोपींची माहिती काढली असता सदर गुह्यातील एक आरोपी कल्याण आंबिवली येथील इराणी वस्तीत राहत असल्याची माहिती मिळाली. त्यामुळे पोलिसांनी सदर परिसरात सलग तीन दिवस रात्रीच्या सुमारास पाळत ठेवून आरोपी शेरु याला ताब्यात घेतले. त्यानंतर पोलिसांनी त्याची चौकशी करुन सदर गुन्ह्यात त्याने लुटलेले ७० हजार रुपये किंमतीचे दागिने हस्तगत केले. त्यानंतर पोलिसांनी त्याची अधिक चौकशी केली असता, त्याने आपल्या साथीदाराच्या मदतीने कळंबोली, कामोठे, खारघर, सीबीडी-बेलापूर तसेच मुंबईतील मुलुंड, नवघर, अंधेरी एमआयडीसी या पोलीस ठाण्याच्या हद्दीत चेन स्नॅचींगचे गुन्हे केल्याची कबुली दिली. त्यानुसार पोलिसांनी त्याला अटक करून सदर पोलीस ठाण्याला त्याचा ताबा घेण्याबाबत लेखी पत्राद्वारे कळविण्यात आल्याची माहिती पोलीस उपआयुक्त विवेक पानसरे यांनी दिली. दरम्यान, सदर आरोपी विरोधात यापूर्वी ठाण्यातील कापुरबावडी, भोपाळ येथील गांधीनगर, ऐशबाग कल्याण तालुका, मुंब्रा, बदलापुर, शांतीनगर या पोलीस ठाण्यात विविध प्रकारचे १० गुन्हे दाखल असल्याचेही पोलीस उपआयुक्त विवेक पानसरे यांनी सांगितले.
फोटो : अटक आरोपी संदर्भात माहिती देताना पोलीस अधिकारी