तोतया पोलिसाने ज्येष्ठ नागरिकाला लुबाडले
पनवेल दि. २७ : पोलीस असल्याची बतावणी करून एका ७० वर्षीय जेष्ठ नागरिकाची सात ग्राम वजनाची सोनसाखळी चोरल्याची घटना कर्नाळा सर्कल येथील भाजी मार्केटमध्ये घडली आहे .
पनवेल शहर पोलिसांनी या प्रकरणातील तोतया पोलिसांविरोधात गुन्हा दाखल करून त्याचा शोध सुरु केला आहे. सुकीर भोईर (वय ७०) हे धाकटा खांदा येथील रहिवासी असून ते पनवेल येथील वीजबिल भरण्यासाठी गेले होते. भोईर हे कर्नाळा सर्कल येथील भाजी मार्केटजवळ आले असताना एका व्यक्तीने त्यांना पोलीस असल्याची बतावणी करून थांबवले. त्यानंतर त्याने पुढे पोलीस तपास सुरु असल्याचे सांगून अंगावरील दागिने कागदात बांधून ठेवण्यास भोईर यांना सांगितले, यावेळी भोईर यांनी आपल्या गळ्यातील सोनसाखळी काढताना चोरट्याने हातचलाखीने ती चोरली. या प्रकरणी भोईर यांनी पनवेल शहर पोलीस ठाणे गाठून तक्रार दाखल केली.