स्वातंत्र्यसेनानी स्वर्गीय गिरीराज अगरवाल यांच्या स्मृतीप्रित्यर्थ पनवेल रेल्वे स्थानकाला वॉटर फिल्टरची भेट
पनवेल /प्रतिनिधी :
अग्रवाल समाज वेल्फेअर असोसिएशन पनवेल यांच्यावतीने नुकताच पनवेल स्थानक परिसरामध्ये एक समाज उपयोगी उपक्रम हाती घेण्यात आला.नंदकुमार अग्रवाल यांच्या स्वखर्चातून दोन वॉटर फिल्टर आणि कुलर्स कार्यान्वित करण्यात आले. स्टेशन मास्तर जयप्रकाश मीना यांच्या शुभहस्ते फित कापून सदर अभिनव उपक्रमाचा शुभारंभ करण्यात आला.
सुदृढ समाज निर्मितीमध्ये अग्रवाल समाजाचे योगदान नेहमीच भरीव आणि ठसठशीत राहिले आहे. जलसेवा हीच सर्वश्रेष्ठ सेवा असल्याचे या समाजाचे मूलभूत तत्व आहे. म्हणूनच जलसेवा करण्याच्या उद्देशाने नंदकुमार अग्रवाल यांनी त्यांचे वडील स्वातंत्र्यसेनानी स्वर्गीय गिरीराज किशोरजी अग्रवाल यांच्या स्मृतिप्रत्यर्थ पनवेल रेल्वे स्थानक परिसरामध्ये दोन फिल्टर आणि कुलर कार्यान्वित केले आहेत. पनवेल रेल्वे स्टेशनचे स्टेशनमास्टर जयप्रकाश मीना यांच्या शुभहस्ते फित कापून या दोन फिल्टर आणि कुलर्स चे लोकार्पण करण्यात आले. याप्रसंगी पनवेल खारघर आणि नेरूळ परिसरातील अग्रवाल समाजाचे सदस्य,पदाधिकारी आणि त्यांचे कुटुंबीय मोठ्या संख्येने उपस्थित होते. पनवेल महानगरपालिकेचे नगरसेवक राजू सोनी, समाजाचे अध्यक्ष तुषार अगरवाल, सचिव अनिल बगाडिया, कोषाध्यक्ष हेमंत अगरवाल,गौतम अगरवाल यांची प्रमुख उपस्थिती होती.
स्टेशन मास्टर जे पी मीना यांनी अग्रवाल समाजाने दिलेल्या योगदानाबद्दल त्यांचे आभार मानले तसेच भविष्यात देखील जेव्हा जेव्हा स्टेशनला गरज लागेल तेव्हा अग्रवाल समाज खंबीरपणे उभा असेल असा विश्वास व्यक्त केला.