पनवेल परिसरातील दोन वेगवेगळ्या अपघातात 3 जखमी
पनवेल, दि.8 (वार्ताहर) ः पनवेल परिसरात झालेल्या दोन वेगवेगळ्या अपघातात तीन जण जखमी झाल्याची घटना घडली आहे.
संजोग करंडे (40) हे आपल्या आई वडिलांसोबत अल्टो गाडीने पनवेल सायन रोडवरुन प्रवास करीत असताना सियाज गाडीवरील चालकाने रस्त्याच्या परिस्थितीकडे दुर्लक्ष करून अविचाराने वाहन चालवून अल्टो गाडीस धडक दिल्याने झालेल्या अपघातात आनंद करंडे (72) व गजगौरी करंडे (63) हे दोघे जखमी झाले आहेत. या अपघाताची नोंद कामोठे पोलीस ठाण्यात करण्यात आली आहे. तर दुसर्‍या घटनेत गव्हाण फाटा येथून अज्ञात आरोपी हा त्याच्या ताब्यातील वाहन घेवून भरधाव वेगाने जात असताना त्याने पादचारी सुदीप्ताकुमार प्रवीरकुमार ठाकूर (43) याला धडक दिल्याने त्याच्या नाकास गंभीर दुखापत केली आहे. या अपघाताची नोंद पनवेल शहर पोलीस ठाण्यात करण्यात आली आहे.
